علق الإعلامي أحمد شوبير على أزمة مستحقات حسام عبد المجيد، مدافع الزمالك، مؤكدًا أن اللاعب من حقه الحصول على مستحقاته المالية حال ثبوت أحقيته فيها، مشددًا على ضرورة التزام النادي ببنود التعاقد. وقال شوبير عبر إذاعة «أون سبورت إف إم»: «موضوع حسام عبد المجيد في الزمالك دمه مش خفيف، الناس بتزعل، اللي يزعل يزعل، محدش يزعل من الحق، أنا لو ليا حقوق لازم أخدها». وأضاف: «أنا بسمع إن حسام كان لازم يقدر الزمالك، ماهو حسام قدر الزمالك ولعب معاهم ومأثرش، وجاله عرض والزمالك مشاه، والفلوس بتاعته ساهمت في حل أزمة الزمالك. أنا ليا فلوس، يا جماعة أعطوا الأجير حقه قبل أن يجف عرقه، ده عرقه جف ونشف وسافر ورجع وطار وطلع ونزل، وبعدين يقولك أصل عليه خصومات». وتابع شوبير متسائلًا عن طبيعة الخصومات الموقعة على اللاعب: «خصومات إيه؟ لو حسام عبد المجيد ليه فلوس ما ياخدها». وأشار إلى أن الحديث عن مبلغ 800 ألف جنيه يتطلب الرجوع إلى بنود عقد اللاعب، موضحًا: «قالك إيه الـ800 ألف جنيه مش مستحقات مالية متأخرة وإنما قيم
مالية تم خصمها بواقع 10% من قيمة عقد اللاعب، والتي تنص على خصم هذه النسبة حال عدم تحقيق بطولتين أو أكثر خلال الموسم». وأضاف: «لو منصوص عليها في العقد مقدرش أفتح بوقي معاك، وقالك في خصومات عشان البطاقات الملونة، وقالك إن حسام مفيش أي مستحقات متأخرة له بعد صرف مستحقاته. عمومًا العقد شريعة المتعاقدين، وما تنص عليه العقود هيسري». ووجه شوبير رسالة إلى نادي الزمالك قائلًا: «أنصح الزمالك لو ليه حقوق ياخدها، ولو عليه واجبات لابد يؤديها». كما حذر شوبير الأندية من توقيع خصومات على اللاعبين بسبب نتائج المباريات، مؤكدًا أن مثل هذه الإجراءات لا تتوافق مع قواعد الاحتراف، وقال: «في نقطتين مهمين جدًا وأنا بحذر وبنبه الأندية عشان يعملوا حسابهم». وأوضح: «إحنا اللاعيبة عندنا مؤدبين وبيعملوا احترام وخاطر للجمهور، بمعنى إنك تيجي تقول خصم 25% من عقود اللاعبين بسبب الخسارة، ده مش موجود في الاحتراف. يعني أي لاعب يروح يشتكي إنه اتخصمله بسبب هزيمة، مفيش حاجة اسمها كده، والفيفا يقولك اديله فلوسه». واختتم: «وبعدين
خصم مش عارف إيه من العقد عشان مباراة الكونفدرالية الزمالك خسرها، وهو ماله؟ هو لعب وخلاص، أنت تخصم لو في ادعاء مرض، غياب بتاع، لكن اللاعيبة المصريين مؤدبين جدًا جدًا وبيعملوا حساب العِشرة».