انتقد محمد عمر، نجم الكرة المصرية السابق، حالة الجدل المثارة حول التحكيم قبل انطلاق منافسات الدوري، مؤكدًا أن الأندية الكبرى مطالبة بالهدوء وعدم زيادة الضغوط على الحكام. وقال محمد عمر في تصريحات إذاعية: «معجبنيش استباق بعض الأندية قبل ما الدوري يبدأ، في التنويه على الحكام، كان النادي الأهلي طلع بيان، ما لوش لازمة، أنت النادي الأهلي». وتابع: «عشنا وشفنا الأهلي والزمالك بيشتكوا من الحكام، ده إحنا كنا بنصوت زمان في الثمانينات من حكام، ما تقدرش تتكلم، ما تقدرش تفتح بقك». وأضاف: «مباراة بيراميدز وأبو قير هتلاقي فيها أخطاء حكام، حد بيتكلم عنها؟ فيه تجاهل لبقية الأندية». وأكد محمد عمر أن الأهلي والزمالك باعتبارهما قطبي الكرة المصرية، يجب أن يكون لهما دور أكبر في تهدئة الأجواء، قائلًا: «إنتوا قدوة الكرة المصرية، القطبين أهلي وزمالك بالتحديد. مينفعش التلاسن اللي بيحصل، مينفعش كل مباراة: أنا ليا ضربة جزاء، أنا ليا رمية تماس، والله عيب». وواصل : «فأرجو يا جماعة، أنتم اللي بتهدوا الكرة المصرية، مش
اللي بتثيروا الناس. إيه يعني متحسبش أوت ولا ضربة جزاء؟ بتحصل في كل دول العالم». وأوضح : «هل تتخيل إن في حكم عايز يغلط؟ استحالة، لأن الحكم دلوقتي بقى طموحه كبير أوي، سواء المادي اللي اترفع، أو إنه يشارك في البطولات الإفريقية أو كأس العالم». وأكد أن الحكم يسعى للحفاظ على سمعته والوصول إلى أعلى المستويات، قائلًا: «عايز يوصل لهذه المنطقة بسمعة طيبة، فمينفعش أفضل ألطش فيهم كده». واختتم محمد عمر حديثه قائلًا: «أنا مش مبسوط من اللي بيحصل ده».